希望...

希望今年的壞消息到此為止。

求祢將我輕放於心上!

事實是很難接受!
不過也要面對和接受.
人... 始終是人!
有軟弱也有跌倒.
唯有認清目標!
更加要面對的... 是自己!
給自己一個警惕!

希望弟兄姊妹們不要太難過!
願神保守看顧!
讓我們躺於祢護庇下。

犯賤的我!

返左幾日工... 最唔適應係無得上網!
所以... 決定買過部電話有得上網!
咁就解決到! YEAH!!!!!!!


新公司... 新工作都幾好!
唔駛OT! 因為FC都係6:15彈閘!
佢之前都有同我講唔主張OT.
我以為佢講吓!
原來講得出做得到!
好野!!!


但係... 之前公司陪養左個唔知係好定唔好嘅習慣..
就係OT! 可能真係有D犯賤!
唔OT好似對唔住公司,
過唔到自己!

你地話我係唔係犯賤吖!?

烤襟... 舞DUCK上茫

新公司樣樣都OKAY!
淨係無得上網就唔係好慣!
可能之前果間實在太自由啦~
攪到好似無得上係公司唔啱咁!
其實好多朋友仔公司都無得上..
要習慣吓!!!!!!

最後出擊

今日再戰果醬... 菠蘿火龍果果醬!
朋友仔之前極力推介... 所以一定要試!

因為驚返左工無時間整!
所以快D試埋! AND 要還人情債!

:]

暫別少奶奶生活!!!

終於要返工啦!
少奶生活暫時要停一停!
係時候收拾心情... 上班去!

休息左5個月... 都係時候架啦!
雖然係好遊閒,
不過... 都真係有D悶!

至於D飲食篇...
就要等到星期六日先有得分享啦!
相信最開心都係老公...
因為... 佢終於可以真真正正進行減肥計劃啦!

Ocean Park

好耐無去啦!

都幾好玩... 不過真係好多人!

可能撞啱近10月1國慶..

仲有好多內地人仕...

所以乜都排餐死!

一直都麻麻地熊貓,

去完都係一樣... 仲覺得佢地好懶!

唔怪得咁肥!

無乜特別野睇.. 我又唔玩機動..

所以今次行程都係一般!

不過最好玩都應該係Anya BB,

8個大人陪佢...

好似公主出巡咁!

香港半天遊

今日一行四人去左香港島食野...

其實主要目的係帶鄭生食吓香港特色野!

上次睇電視佢話好想試吓D綠色鐵皮大排檔!

所以就同佢去試下...

順帶自己都食埋一份!

因為得半日時間...

所以唔係去到好多地方!

早上蓮香酒樓飲早茶,

人山人海...

多人到... 要搶點心!

跟住去左綠色鐵皮大排檔食蕃茄通粉+咸檸七!

正!!!!!

三叔公給姨婆的國慶禮物

好耐無打過羽毛球!
今日8個人, 齊齊去打波...
打左兩鐘... 好攰!! 有D痛!!
不過... 都唔夠"姨婆"痛,
因為"三叔公"請左個"餅"佢食...
成塊yy打左落佢個咀度...
腫左... 邊大邊細!
好似xx咁!!!

"上一輩嘅恩怨... 下一代嘅我地又點會明"
我地咁多個伙拍三叔公都無出事,
淨係姨婆一個中招! 可憐!!!!!!

三叔公送哩份建國六十年嘅禮物比姨婆.... 都算有意思!
以後佢地打親波都一定會記得!!!
而我地哩D後生就必定會醒醒定定!!

林 C NINE - 甜品篇<7>

自家製果醬

第一次整... 菠蘿 & 士多啤梨!

唔知好唔好味!?

不過跟足朋友仔指示去整,

應該okay好味! ^-^

(試過味甜度啱啱好... 凍左唔甜!)

老公厭supermarket買果D好甜...

所以自己試吓整!

希望啱老公口味!

期待!!!!

不上班的千萬個理由...

好好笑... 都幾有用!!!
有參考價值!!!!

林 C NINE - 甜品篇<6>

自家製冰皮月餅又黎啦!

停左兩年, 今年又整番!
總共整左50個!
奶皇紅豆各半...
(有D紅豆有綠茶餡... 因為紅豆唔夠)

奶皇餡炒到手都跛~~
次次整完都話唔會有下次,
但係... 都會又整過!
不過, 的而且確好香.. 好好味.. 好滑!!

老公星期六同我去買材料,
佢見"二德惠"樣樣野都有現成,
現成冰皮粉, 綠豆餡, 奶皇餡, 紅豆餡, 芝麻餡....
問我點解唔買果D,
要自己煮/炒...
我話因為果D唔叫自己整,
只係將人地整好嘅野,
買番屋企 然後將佢地混為一體,
咁都叫自己整.. 就算好食都係人地D材料好..
唔關自己事!!!
去大班買仲好!!

不過... 今年都有D懶,
無整綠豆, 改為紅豆...
如果整埋綠豆餡一定連命都無!
依家都整左7-8個鐘...
腰骨都直哂!!!

哈... 今年要特別鳴謝老公!
因為佢都有份整!!
(奶皇餡果D)
希望有機會食到嘅朋友仔...要細心享受!

冰皮月餅... 有機會出年再見啦!!!

媽咪新曆生日!!!

新曆同舊曆差幾日...

又有得食!!!

去左間好多人都話好好食嘅酒店食buffet!!

總果... 有D失望!

唔係外界所講咁好食!! :(

不過.... 算啦!

媽咪生日... 佢都幾鐘意食buffet,

雖然佢都覺得麻麻地!!!

無免費飛啦!!!

一直有朋友公司支持..
可以有免費演會睇!
依家連佢公司都結業..
以後都無免費飛啦!!!!

不過... 最傷心應該係我細佬!!!
一係快D搵個有免費飛朋友...
一係就自己比錢睇!!!!!

:(

媽咪大壽!

今日係媽咪農曆60大壽!

本應諗住大攪...

不過佢話唔好!

因為女人唔可以做60大壽WOR~~

BUT佢又無講可以幾多歲先得...

唯有自己屋企幾個人去食飯啦!

去左東海...

唔係因為果度D野好食,

而係媽咪鐘意果度D加大碼壽包!

全餐飯就係期待最尾果個壽包!

的而且確個壽包又真係好好味!

祝媽咪生日快樂!!身體健康!! 快D信主!!!!!

又整到...

星期三搬完個免費printer,
條腰有D痛... 可能整親!
直至星期五晚...
由後面伸延到前面,
總之坐同瞓都痛,
最痛係深呼吸!
扯住痛到入心...
幾晚都無瞓!!!

今日同老公去左游水...
希望可以有D幫助!!!
不過到現時都係差唔多! :(

林 C NINE - 甜品篇<5>

今個星期好忙!!
教會事務佔左三分二,
林生以為我同教會打工!!!
加上打風... (藉口)
星期三鄭生一枝公上黎食飯,
因為鄭 C NINE 約左同事!
都幾好... 下次我約左人...
林生都有飯開!!! XD


今日叫做得閒D,
朝早去完阿官度pre-查...
之後同麥傳導(過氣神學生)飲茶,
之後就去左吉吉島大出血...
因為有九五折!
返到黎就煲湯!
見距離晚飯時間仲有空檔...
用左大半個鍾整左個快速甜品!
<<椰汁西米糕>>
不過D西米唔靚!
有D"木木地"味...希望靠D模搭夠!
食起OK啦!!!
今晚有得食.... 食左就知得唔得!!

巨爵留倩影

果晚無聊隔住個窗影...

都幾靚!

好似打碎玻璃咁!!

又颱風

今年D颱風都有一個共通點... 有時差!
全部唔係放左工或者星期六日到!
完全益唔到打工仔!
(雖然我無工番... 不過我老公有吖嘛)

琴晚九點三同老公出左去紅磡碼頭睇巨爵,
(哩兩年一打風就去睇浪)
巨爵應該係今年最勁...
我地跟本連碼頭都出唔到!
大風到飛起!!!
最叻行到去巴士站個涼亭,
吹到連雨衣都飛起哂...
跟本都唔係自己行出去.
企係個涼亭都已經全濕!
眼見有班青年人手拖手係碼頭邊玩浪...
叫到聲嘶力竭!!!
企係岸都有得玩浪... 都係第一次見!!
有對情侶 (唔係我地) 企係碼頭餐廳門口食浪...
個男唔係攬住女朋友... 而係攬住碌柱!!
個女就扯住個男人... 扯唔實一定飛走!
跟住見到好多私家車陸陸續續駛黎碼頭,
應該係想加入玩浪!
越企越橫風橫雨...
我地見勢式唔妥,
都係決定企番係個亭度算!!
如果唔係Mak Sir 段片一定係我同Benson! :D
http://www.youtube.com/watch?v=o01gzkZ4O54&feature=player_embedded

幾經艱辛終於十點二返到屋企...
由頭到腳濕哂!
連我件雨衣都要報銷!

沖完涼洗完頭諗住早D瞓...
點知果個巨爵攪到個成晚無覺好瞓!
成晚起身睇水...
最後決定閂哂全屋窗!
跟住D雨聲風聲係窗邊係咁吹...
成晚好似鬼叫咁!!

無瞓過!!!

林 C NINE - 住家菜篇<4>

琴日開完小組...係屋企攪左個海鮮餐!!

本應諗住九大簋... 點知買唔到蟶子,

所以得八大碟! 有D失望!

不過佢地都話好好味...

仲有... 係屋企食真係平過係街食好多好多!

每人連埋飲品都係50蚊多D!! 抵 x 100!!

當日菜單:

白灼東風螺 - 螺仔.. 好味!
白灼蝦 - 花蝦... 好新鮮!
蒜蓉蒸扇貝 - 大隻... 好味!
炒蜆 - 無落青紅椒... 賣相差D! 不過姨婆話都好野味!
花鵰醉雞 - "叔公"話唔夠酒味! 下次落多D... 醉到你暈!

蒸魚 - 勁抵+好味... 旺角街市出品 $15-

蘿蔔炆豬軟骨 - 好冧好入味!
魚唇翅冬菇扒生菜 - 打開蓋唔見左D魚唇翅... 溶左!

林 C NINE - 甜品篇<5>

今日整左黑豆漿!

又係老公至愛!

今次比上次好好多...

無煲蕉到!! 都好好味!

不過唔夠滑... 水質問題... 無法!

總共有5支..

攞左支比鄭 C Nine..

免得佢投訴!! :P

佈道會

今晚一行十個去聽林以諾... 忠奸道 – 谷住喺度無出路!
其實都唔係第一次去...
不過次次去都好鍾意個敬拜!
真係好正! 雖然對西伯D歌唔係咁熟,
不過次次佢帶完都好鍾意佢D歌!
今次都唔例外!!

至於個talk... 對我黎講有少許幫助,
可能自己已經唔係職埸人仕,
加上又學習緊凡事交比神...
又好enjoy宜家生活,
所以暫時無野谷住喺度無出路!!
不過好認同牧師所講...
宜家有份工已經係好好啦!
好難會搵到一份自己又鐘意又有人工嘅工作!
所以... 努力做一份有人工但無意義嘅工,
其他時間就去做有意義but無人工嘅工去平衡自己!

我諗紅姑應該係今晚中箭最多嘅人...
句句到肉..針針見血!!!

週二閒情...

今朝又去左週二閒情!
本應諗住幫下得番半條命嘅官姑...
佢又病... 又要閒情...
點知都係得我地果幾個,
所以我都玩埋一份!
今日主題又係陶瓷... 好玩!
第二次玩啦... 上次整左個好大筆桶!
本應諗住整個大杯 (可以盛湯果D呢),
點知整完出黎覺得唔夠大...
最後改裝成一個兜,
整下整下... 加隻蝴蝶結比佢...
攪攪下一D話似頂帽..
一D話似花盆,
其實我都唔佢似乜..
不過唔穿就得啦!!! :P

大家話佢似乜野???
不過仲未燒KA.. 燒好左再影比大家睇!!!

林 C NINE - 甜品篇<4>

今日McKathy黎左我屋企相聚加整野食..
佢見我個blog整D甜品好好味,
好想整下... 所以我地今日整左 >>>> 馬拉糕!
我都係第一次整,
都似模似樣!
D味都OK! (由阿紅評審過)
老公當然話"正"啦!
因為係佢favour嘛~~
一蒸起真係好鬆軟!!
好味!!!

林 C NINE - 住家菜篇<3>

是日晚餐... 黑豚豬扒Pita Bread 配 忌廉南瓜湯!!! yummy yummy ~~~
老公第日帶番公司食... D同事以為佢係樓下 Pret A Manger 買!
個個都話睇見都好想食! :D
講真... 如果係出面食哩個包真係要30-40蚊...
依家50蚊可以整到6件... 平好多!
又好味又新鮮!!!

林 C NINE - 甜品篇<3>

Haha... 今次整左阿紅專利!! Tiramisu..

不過老公話麻麻地... 因為佢唔鍾意太重RUM酒味...

我都覺得重手左D!!

不過食完可以早D瞓著... 都唔係唔好! :D

林 C NINE - 甜品篇<2>

靚唔靚呢!? 晶瑩剔透.... 知唔知係乜東東... 桂花糕呀! 玫瑰花型ka...
我覺得甜左D... 不過D桂花真係好香!
老公話好好味!!! 唔覺得好甜!!
不過賣相都已經攞滿分啦!!! YEAH!!!! Yummy!!!

林 C NINE - 甜品篇<1>

<<糯米糍>> (應該睇得出)

綠茶紅豆 & 椰汁士多啤梨 (總共整左30粒..於星期六沽清)

因為老公皮膚問題...
所以唔整得芒果!
諗左好耐... 於是用士多啤梨代替!
老公當然讚好食啦!
因為homemade.. 所以大粒左D..
不過...麗怡complain士多啤梨唔夠!
下次會檢討!

林 C NINE - 住家菜篇<2>

今日煮左老公好好好鐘意食嘅... 咕嚕肉!!!!!
第一次整...
老公話好好味! 120分 :)
佢話好食過出面果D!
D肉好鬆, 菠蘿好juice...
不過我同佢講... 唔會成日整,
因為要用好多油... 好浪費!
整完D油都唔要得!!
(同埋我懶 :p)

不過... 我會繼續做好哩份工!
煮多D好野比佢食... 谷肥佢! :D

林 C NINE - 住家菜篇

是日晚餐自家製水餃 :)
其實我對厚皮野麻麻地~~
不過男主人鐘意...
就整下啦!

<菠菜豬肉餃>
分數: 98
佢話D餃有魚味!?
我都唔明點解...
只係得豬肉 & 菠菜...
點解會有魚味... D魚味係邊度黎?
激死人...
下次再努力!!!!!!!

培靈會.. 完結也是開始!

第一次去培靈會，
起初, 聽到個名覺得會好悶，
不過佢地話身為基督徒應該要去下...

好在有去！真係獲益不少，
精彩...入心...內疚...
做左基督徒差唔多5年，
一直以為都幾好...
有事奉、有靈修、有奉獻...
總之有需要都會幫手...

不過...聽完之後先知自己仲有好多好多唔掂，
對神嘅信心... 不足!
講好易... 做好難!
唔信得個神真係一位會供應的神!
計劃好多野... 驚哩野... 驚果樣!
絕對唔容許事情不在自己控制範圍內!
無安全感!
所以好多時唔會比神參予...

由今日開始... 要重新整理自己!
係個心度...留返個位比神!

第三輪... 終於到我!

2009年4月最後一日...
亦都係我係哩間公司嘅最後一日!

第三輪... 終於輪到我!
加入失業大軍行列!
大約12時... 老細call我入房,
從電話中已知事有不妙,
同平時語氣不同...
入到去... 講一輪廢話, 問我估唔估到乜事,
講真... 一早就有心理準備(都準備咗3個月啦)
公司生意咁差, 個個月都紅色...
唔炒先至奇!
都好... 起碼有得陪!

依家... 唯有好似大家所講,
係屋企休息吓先!

忙到嘔!

上星期五裁員後,
接咗成個部門黎做,
聽落好似好勁,
實質做到隻狗咁!

一個人做4個人野...
真係想做死我!
所以日日做到89點先收工,
人都顛..
仲要返到屋企繼續做!

2nd round

今日...終於宣佈裁員名單!
即日生效!
同事們都愁雲慘霧!

雖然我今次可以逃過一劫,
不過, 唔代表安全,
因為仲會繼續有...
哩d日子真係唔好受!

1個人做4個人嘅工作...
仲要帶住今日唔知聽日事嘅心情,
就算幾努力都未必做到好成績!

同事們... 大家互相守望!
希望可以共同捱過2009!

重症肌無力

在家第三天!
瞓覺...休息... 聽電視... 休息...
已經開始食到野,
講野都有番力氣;
不過... 到眼睛有問題,
睇野有出現重影的複視,
個人暈舵舵...
行每一步都要好小心,
因為唔知安唔安全,
尤其是上落樓梯,
好易差錯腳...
睇電視都暈... 因為foucs唔到!
只好聽啦!!

眼皮下垂, 複視, 說話含糊, 呼吸及吞嚥困難,
都係重症肌無力嘅病徵,
醫生都係建議我休息,
因為休息係灰復體力最快嘅方法...
所以都係瞓啦!!!

復發

可能近來壓力實在太大,
開始食野同講野又出現問題...
但, 我依然有返工,
因為我怕... 再請病假,
第一個就裁我!
:(

無諗過... 壓力可以咁大威力!

壓力.... 病!

從來未試過痾咁耐唔好!
已經食唔落, 仲要一食就痾!
又胃痛... 救命!
可能真係壓力大!

今日高層又開會...
鞋口鞋面咁出黎...
好似出殯咁!

究竟仲要折磨到幾時?

涯得一日得一日

這星期... 公司氣氛差透,
心情都有點沈!
如題一樣... 涯得一日得一日!
因為公司又準備裁員,
收到消息, 今次比上次還要多...
不論你是否忙與否,
都有可能成為名單上一份子...sigh!
經濟差, 市道差, 生意差...
就係員工度落刀...
咁經濟好番,
公司又會唔會請反被裁嘅人!?

琴日係朋友公司見到,
詩篇23篇... 好窩心!
真係好慶幸自己係基督教,
如果無神,
我會因環境而改變而變得沮喪... 無盼望!

雖然前路唔知會點,
不過, 我深信神一定會幫助,
Thanks God!

耶和華是我的牧者. 我必不至缺乏。
他使我躺臥在青草地上、領我在可安歇的水邊。
他使我的靈魂甦醒、為自己的名引導我走義路。
我雖然行過死蔭的幽谷、也不怕遭害.
因為你與我同在.你的杖、你的竿、都安慰我。
在我敵人面前、你為我擺設筵席.
你用油膏了我的頭、使我的福杯滿溢。
我一生一世必有恩惠慈愛隨著我.
我且要住在耶和華的殿中、直到永遠。

Happy Birthday!!

今日係老公牛一
祝佢身體健康!
每年生日都要諗去邊慶祝,
買乜禮物...
講真... 真係好難諗!
好多野都有,
貴嘅又買唔起... :p
真係有難度,
安排咗聽日一齊放假...
不過, 仲未知去邊! :D
放咗先算! hehe..
希望比到佢一個快樂生辰!!

又痛...

肩週炎又發...
醫生話元兇應該係清潔時引致,
咁.... 點算?
唔抺呀?

舊同事

今日同舊同事食飯...
一枱六人... 六間唔同公司!
但依然可以有共同話題!
斟得好開心... 仲覺得時間過得好快,
難得! 難得!
人真係唔可以無朋友,
不過, 我認識的朋友當中,
有某些人真係可以無朋友,
因為...佢地認為出黎食飯係浪費時間和金錢!
一樣米養百樣人!

Bad News again...

今天又有壞消息...
公司裁員!
全公司都愁雲慘霧...
個心好up...
雖然我今次可以大步檻過,
但係都唔代表穩定!

2009年... 一個月還未過,
就已經有咁多唔開心嘅事!
:(

又一噩耗...

2009年只係過咗十日到...
就已經有兩個壞消息!

星期一零晨... 舅公離世!
雖然我與他的感情一般,
不過... 他卻令我想起爸爸,
因為他與爸爸的關係很好!
想起他的每個片段都會連帶想起爸爸!!

懷念你們!
願你們在天國快樂!

螢光保齡

上星期五公司攪咗個保齡運動,
原來今年連Annual Dinner都無埋,
真係慳家!
不過都幾好玩... 因為比賽完之後,
全場熄燈... 變哂螢光!
嘩! 好靚!!!
不過, 如果自己比錢打一定唔會...
因為太過迷幻... 好難對準!

2009年第一天的噩耗... 給譚國華牧師的信

譚牧師，

相信您不記起我，但對我而言... 您對我有很深很深的記憶和影響，因為您是為我受浸的牧師！仍然記得受浸那天您對我說過的每一句話，您和藹可親的笑容，您的風趣幽默... 與其他牧師有很大的不同，雖然只是認識您那短短數分鐘，您已經給我不斷的安慰和支持，因為我實在太害怕，不知受浸時應該怎樣做才可將全個人放鬆向後落水！但您卻給我莫大的信心和鼓勵，叫我不用怕... 放心的向後，您會扶得住我的！多謝您！

1月1日的早上聽到您離世的消息，沒想到... 真的沒想到，由知道有急性血癌病到離世只是短短的四天，就已經離開了我們。您還是這麼的年輕... 兩個小孩還是那麼小！今天早上看回12月14日錄影証道... 您依然的健康，依然的笑容，沒料到十數天後的您已返回天家！願神親自安慰您的家人！永遠懷念您！

主懷安息！

Happy New Year 2009!!!

新一年, 新開始,
今朝一早起身就見到非常美麗的晴天,
藍色天空!! 好開始! :)

2008年的結尾

相信哩呢篇應該係2008年最後一篇,
因為懶...因為忙... 因為身體唔好... 因為...
因為以上諸多理由, 所以唔係時時update!

今日都係病...
2008年, 病得好密, 可以年紀大...
身體差, 自我修復能力低!
不過... 病都有好多說話聽,
有人真關心... 有人假關心,
關心背後有動機... 當然指公司居多!

靈命方面... 比起自己身體好得多,
起碼無病過, 同埋有少訐進步!
值得感恩! :D

詩篇23篇 ~
耶和華是我的牧者。我必不至缺乏。
他使我躺臥在青草地上，領我在可安歇的水邊。
他使我的靈魂甦醒，為自己的名引導我走義路。
我雖然行過死陰的幽谷，也不怕遭害。
因為你與我同在。你的杖，你的竿，都安慰我。
在我敵人面前，你為我擺設筵席。
你用油膏了我的頭，使我的福杯滿溢。
我一生一世必有恩惠慈愛隨著我。
我且要住在耶和華的殿中，直到永遠。

共勉之~~~

祝願大家2009年身體健康!

安份守己

如果用這四個字來形容職場的我... 絕對唔合適,
不過, 我相信我要努力跟他們好好的學習!


唔係話自己好勝.. 只係覺得進取!
不過似乎都唔適用於現時!!
努力學習安份守己!!!

:(

婆婆的八十大壽

剛過去的星期六是婆婆的八十大壽!
一家人一齊食飯, 一齊興祝,
雖然唔齊人... 不過都好開心!

希望婆婆身體健康! 老如松柏!!!!!

沈

近期電視播好多旅遊特緝...
攪到我好想去旅行!

不過而家經濟又唔好,
又好想留番個錢以防萬一,
話就話公司好忙好多野做,
點知佢會唔會炒我ka...

身邊已經有幾個朋友就快無工做,
唔知自己會唔會好快加入佢地團隊?

究竟經濟重要沈到幾時?

已經一年

今日係結婚一週年紀念...
回望...時間真係好快!

一年裡倆口子一齊面對好多,
雖然中間有淚..
不過總括都係開心多!
有時候我都會去番個wedding web度..
睇番朋友仔留比我地嘅說話!
http://www.peggy-benson.com

希望住後日子依然開心快樂!
"我們愛, 因為神先愛我們."

忙

工作好忙... 大陸香港兩邊走!
以前誓死唔返大陸... 依家都無得我say no.

不過眼見隔離個部門得閒到死...
唔係中眼瞓, 就係facebook, youtube...
真係人都顛!

點解佢地可以咁得閒,
仲可以請人,
而我地dept咁忙... 就無headcount!
乜野世界?

又出現同一間公司,不平等現象!

神呀... 求你幫助!!!!

黑黑黑

條頸痛完又到條腰, 唔停咁痛... 痛到連覺都瞓唔到! 已經有做運動架啦... 都唔明?

琴晚痛到醒咗, 跟住就瞓唔番啦... 今朝一早去睇"鐘發", 醫師話我條腰第x同第x唔啱位, "落"咗幾野, 好似好d, "落"完條腰係好咗, 不過... 行路到大脾好痛! 救命呀!!! 點解咁架? 咁快就退化?

好痛呀!!!!

C3H6N6

近來乜都唔食得,
唔係因為腸胃問題或者身體毛病,
而係樣樣野都有毒...

起初話36有問題,
心諗好在無飲過... 唔關我事,
以為大步檻過, 點知越驗越多,
終於我日日都飲果隻" 三义高鈣低B"都出埋事...
罐野新買ka... 啱啱開第三日,
咁點算呀!

諗咗幾日都無掂過佢,
本死無大害... 再攞番黎飲(百幾蚊一罐ka),
罐上指示: 4匙1杯水; 我就1匙1杯水,
(開咗出黎, 完全唔似奶... 灰色ka)
我諗應該無咁易有事...
飲咗4日, 同事媽媽今朝見到,
立即喝止我, 佢問我係唔係想死,
我就將我個偉論話比佢知,
不過, 佢都係唔比我飲!! 仲沒收埋!!
聽日連奶都無得飲... :(

日日返到公司就會有同事話比我知,
又有d乜野唔食得...
今日連m&m都話有事,
我平時month-end靠佢黎釣命ka,
5粒就超標...咁點算,
每個month-end都食大半包...
咁我係唔係要去驗吓呢?

點解咁無良...係d食物度加化工原料?
佢地d仔女唔飲奶ka?

自殘

又一個月後update...

因為實在好忙!
忙咩!? 返學啦.. 工作啦.. 睇醫生啦!!
哩三樣都有排玩... 死我!

近來"退休"這兩個字不時係我腦海出現,
可能實在太忙而且時時都病,
令到我都不禁唔認老!

人越大, 機器就越易壞,
仲要壞咗就好難好,
過哂保養期!!
有錢都唔受保... 仲可況無錢!
有人話辛苦搵黎志在食,
不過... 又怕肥!
咁... 辛苦又為乜?

講完一大論廢話, 都係繼續開工,
繼續自殘... 做死自己!!!

結束了...

2008年8月24日京奧閉幕,
相比開幕...依然壯觀及驚喜!

2008北京奧運正式"完滿"結束!

這真的是完滿,
由開幕到閉幕,
祖國都做得非常出色,
從來欠缺運動細胞的我,
對於奧運都只會留意獎牌數目,
沒想到今次竟然由頭看到尾,
可能是北京的緣故!!

偉大的祖國... 偉大的人民!
合力締造完美奧運!
贏盡無數掌聲及喝采!

中國運動員的超水準發揮,
令我不禁的在家也為他們歡呼喝采;
尤其當國旗升起,
心中的熱也隨之而出,
有時更會跟運動員一樣...
流出開心的眼淚!!!

中國獎牌數目: 51金 21銀 28銅... 總數100!
完美的數字!!

鸚鵡

哩隻鸚鵡都算犀利!

唔單止係佢本身風勢強勁!

而係佢未登陸之前嘅威力...

由星期二開始,

從四方八面收到佢嘅預測,

一時又話星期四到...

一時又話個風好強...

一時又話一定十號...

總之好多消息,

個個都話係可靠嘅!!

攪到個人都集中唔到做野,

琴晚做到好夜先放工,

終於佢今日都到咗!

嘩! 一路寫一路見證住佢由8號變9號...

鸚鵡... 你真係好勁!!!!

2008年8月8日 北京奧運開幕

嘩! 嘩! 嘩! 嘩! 嘩!

就係我一路睇嘅反應!



中國人驕傲!!

諗唔到中國可以有咁出色嘅開幕!

對中國有"挖目相看"嘅感覺!



好有衝動裝番個"高清"睇奧運,

因為有比較之下,

發覺有好大好大嘅分別!

游水... 高清d水靚到... 好似係池邊睇緊一樣!

而唔高果部, 只會覺得真係睇緊電視囉!



所以, 琴晚去咗最近屋企果間豐澤,

諗住即買即用... 點知sales話所有機頂盒都無貨,

有d仲要等個半月, =_=! 奧運都完啦!!

最後買咗個星期三有貨,

仲自己去攞!!!

Back date 網誌 - 31/7生日天

近來... 無事忙!
唔知忙乜... 但總係唔得閒update個blog,
所以又收到complain... 話我點解唔講吓生日!

好!!!

31/7-1/8 放咗假!! 最主要原因唔係因為生日,
而係為咗陪老公, (因為轉新工, 中間有兩日空檔)
生日當天去咗睇早場 - Wall E
本應套戲好好睇, 不過... Wall E竟然有個好朋友,
而我又最驚... "小強", 所以... 有d失分!
跟住去咗windon shopping,
夜晚去咗日航酒店食free buffet!
(鳴謝: Donna送出餐飲禮卷$800大元.. 仲要係31/7到期)

今年收到嘅生日禮物都唔少...
有人話年紀越大, 禮物自然會越少,
我都認同... 因為多數以生日飯代替!

有型眼鏡+花+絲巾 - 多謝老公
詩歌CD 2 隻 - 多謝 Dorothy & Novem
Donald Duck 匙扣+mask - 多謝麗怡
南瓜一個 - 多謝Danny
健康頸繩 - 多謝Candy
My Melody八達通 - 多謝阿心

貓貓匙扣 - 多謝Meg
生日蛋糕3個 - 多謝老公, 媽咪 & 阿紅
生日下午茶 - 多謝關文健伉儷
生日晚飯數餐 - 多謝各位朋友, 細佬及老公
生日message - 多謝各位朋友

生日飯

琴晚... 細佬請食法國菜! :D
開心唔係因為"法國菜"三個字,
而係細佬請!
媽咪都有D眼紅我,
因為佢生日細佬無請過佢,
連禮物仔都無收過!!

今次係細佬自己話要請我食,
最初怕佢無錢.. 所以提議Pizza Hut,
不過佢話可以請貴D,
再提議食西餐...
之後佢決定食法國菜,
雖然哩間係廉價法國餐廳,
不過對於細佬黎講唔算平!

好開心兼好享受一家人一齊食飯嘅時間,
令我諗起Daddy...
佢以前都好鐘意帶我地周圍食同玩,
有新發現就會帶我地一齊去試,
不過...此情不再啦!!
只有留在腦海裡作紀念!

工作又轉變

在這公司工作已經有六個年頭,
很多同事都問我為何可以支撐到今時今日,
他們都覺得工作乏味,
但我偏偏沒有這感覺,
不是因為我遲鈍或反應過慢,
而是我的工作範疇不停的在變,
最長的職務也不過一年...
可想而知, 又怎會覺悶呢!?

而且, 我的身體又不太好,
要找一間公司可以容許我時常請病假,
實在有點難!

所以, 我又怎能不在這公司繼續做下去呢!?

工作間的"基督徒"!!!

無話過工作間的基督徒要好Holy,
時時要將 神放係口邊;
不過...至少唔好差過d非基督徒吖!!!
但原來事實並非如此,
行為陰險到... 真係想摑佢兩巴!
點解會有d咁嘅弟兄姊妹!?
真的掉臉!!!!

雖然聖經講過要愛人如己,
不過, 對住d咁嘅人真係愛唔出!

同事問我... 點解基督徒會係咁!
佢地已經將所有基督徒都label哂一樣!
死未!!!
就算其他基督徒做得幾好都無用,
一個就已經打沈哂!
真係"一竹高打哂一船基督徒"!!!

"友"人投訴

足足一個月無update個blog,
終於收到投訴電話,
問我係唔係忙到連寫兩隻字嘅時間都無,
(講真... 一寫又點會兩隻字咁少)
佢話, 豈碼都比佢地知道我仲健在wor,
原來, blog都有哩個用途!

無寫blog係因為近來用多咗電話溝通,
想用第一身黎收料,
第一時間比反應!
淨係識用msn, facebook & blog同人溝通,
感覺同人嘅距離遠咗,
驚第時變得閉, 唔識同人溝通,
有一日, 大家面對面都要msn,
又或者叫人地睇返自己個blog黎回應人家問題!

不過, 我仍然會繼續培養寫blog哩個習慣,
來滿足我果d由同學變咗做blog友嘅friend~~

搵到啦!

終於搵到佢啦!
原來去咗山西...
而爸爸亦都係四川返到香港!

真係... 擔心死啦!!!

四川地震...

第一時間令我想起我的朋友,
她是四川人, 在香港工作,
而爸媽也跟她在香港居住,
但自從地震的消息報導後,
就聯絡不到她了,
sms也未有回覆!
雖然知到她要到北京工幹,
心知她是沒事的,
但為何聯絡不到你呢?
總是有點擔心!
忐忑不安,
因為她仍然有家人居住在四川,
很想知道她及她家人的現況...

很擔心你... Sally!!!

劉德華 = 白花油

今早聽收音機, 主題本應關於四川地震,
節目主持講述近日市民對此事的反應,
但其中一個主持人講起,
昨天去茶餐廳, 電視並沒有播新聞,
反而播"劉德華演唱會",
主持人心想都是好的,
太多負能量, 個個都苦口苦面,
沒有人有胃口吃飯啦!
播吓劉德華, 正能量多d,
正義d... 跟住其他主持都異口同聲的和應...
劉德華 = 白花油
劉德華 = 關公
劉德華 = 精神領袖...
所有都是令人想起正面的形容,
雖然我並不是劉生的粉絲,
但他的而且確是現時娛樂圈最少緋聞的,
最上進的藝人!

天下老細一樣...

休息咗咁耐... 終於返工啦!
有點不習慣, 好像怪怪的...
返到公司, 同事們都蜂擁而至,
問我的情況, 同一樣的台詞重複又重複的十數次...
不過, 心裡面不禁有點開心,
因為有如此多人關心!!

開工不足五分鐘, 老細已呼喚我入去,
心想... 必定係寒暄數句後就叫我盡快完成這些那些,
哈, 比我想像中長, 還加了點人情味,
他說, 如果我真的支持不了可隨時放工回家休息,
不用覺得不好意思, 他及公司都會以我的健康為大前提,
不要強裝而累壞身體... 真的有點感動!?
太早了, 接著便開始說出他的工作大計...
想完成甚麼甚麼先, 然後又想點點點...
哈... 完全係我想像一樣!
老細, 你係得kai!!!

不順利的病後第一天工作

本來昨天是開始正式工作第一天,
但...對面的外籍人士整個早上都在咳和打噴嚏,
佢不但無戴口罩,
更無用手掩住, 實在太過份啦!!!
我終於忍唔住叫佢戴口罩,
但係佢話 "Nearly recover! No need!!"
Crazy... 鬼大哂呀!!
好... 你唔戴口罩咁我戴囉...
但係... 條氣管唔爭氣,
戴住個口罩就透唔到氣...
終於避佢避到番左屋企!
我唔想因為佢而病, 唔值得!!!!!!!!

今早番到公司, 同事仔已經覺得好surprise...
"Peggy, 點解你仲番工呀? 佢仲未好番wor!"
我話我一定會迫到佢戴口罩.....
隻鬼一路行返位一路咳,
我遞個口罩比佢,
佢都係同琴日答案一日 "nearly recover, no need"
我跟住話佢 "nearly, means not yet! pls use mask!"
佢依然答 "no need, thanks!"
I said "use it, please!"
佢跟住黑面...
我好認真同佢講 "I don't want take sick leave today, my work is waiting for me. Pls use the mask and do not let your virus extend to my area. I need a good working condition!"
佢好無癮, 死死地氣戴番口罩!
而我今日足足提左佢起碼5次叫佢戴番口罩!!!
可能佢會覺得我針對佢,
不過, 我為左自己生命安全,
我都唔會理佢點諗我!
而我同枱嘅同事都為我嘅勇敢而拍掌(係枱底)!

所以, 我今日終於可以返咗一日工啦!
至於我嘅健康, 返咗一日工都算okay! 無咩唔妥!
希望大家繼續為我祈禱!!

神的安排..

足足係屋企休息咗成個星期... 身體機能開始有好轉! :)
好多謝大家關心n代禱!

利用哩幾日係屋企諗咗好多野,
係唔係真係唔可以應付現時工作?
係唔係真係要搵份half-day job做?
如果我唔做野... 經濟有無問題?
神係唔係會幫我攪掂往後嘅日子?
而最令我憂心嘅係... 我嘅健康仲容唔容許我地有BB?

好記得3年幾前, 醫生同我講:
"做完手術後... 3年內個病無復發, 就無事.. 咁就好ka la..."
的而且確3年內無番發過... 不過, 卻唔係佢所講咁無事好番!
星期一果日, 我問佢... 佢話好多野都無保證ka...
(你講哂啦, 病果個唔係你, 你緊係講得輕鬆啦!)

琴晚老官帶查經, 神比咗d野我諗...
"患血漏嘅女人, 憑信心得醫治... 耶穌還確實的同佢講災病痊癒了"
可能我仲未夠信心!? 所以神仲未同我講我嘅病得以痊癒...
一路以黎都係自己認為個病好番...
神正正透過哩個病再次叫我好好思想!

我真係好需要去學習!
深信有一日神一定會同我講... 我嘅災病痊癒了! yeah!!!

健康問題... 工作關係!?

近日健康又開始出現問題..
開始講野有D吃力, 某D字發音好辛苦!

老公好擔心... 佢問我可唔可以唔做野,
因為佢相信全因為工作而令到我嘅健康又出現問題,
的確近來工作壓力大咗好多,
但係我想返工, 因為返工先有價值...
唔做野好似寄生蟲咁...
同埋我放唔底咁耐已黎建立嘅事業!

一日在我可以控制嘅情況底下,
都好希望由自己去話事...去決定!
但老公唔同意,
佢覺得事情未去到最壞或剛開始就要去正視!
明白佢嘅擔心, 但...

期待神可以介入...親自醫治,
4年前都可以, 現在都一定得!
請紀念我!!!

復出

休息咗兩個月... 終於今日復出敬拜小組!
以為自己okay. 點知原來唔係!
係台上面一路唱, 一路覺得好唔舒服..
呼吸好辛苦, 而且血液運行唔好... 所以左邊手腳好痺!
係唔係應該要暫時休息吓?
之前祈禱.. 好希望神比力量我, 比我唱到..
一直都係求神比我, 希望佢跟我要求去做,
但係台果度...我終於都醒啦!
唔係我要求神比咩我, 而係要跟隨神為我所定嘅路而行!
不過, 以我性格... 都有排順服!!!

三八婦女節的贈興?!

今早睇到兩則新聞...


十九歲少女慘遭斷頭 -> 因箍煲不遂, 辣手斬頭, 身中20多刀...
八旬婦疑遭熟人劫殺 -> 遭人綁起雙手,口部封上膠紙倒斃屋內,財物盡失...


點解依家d人咁ka? 拍拖唔夾, 分手咪識個另一個囉, 可能新果個會仲好呢! 係宜家d年青人思想有問題, 定係社會風氣有問題? 真係難理解... 佢係專一定係唔順氣個女仔提出分手先? 我真係聽個有case話, 如果自己提出就無問題, 比對方講先就好無面啦! 乜嘢思想?


另一單仲過份, 攞咗錢就算啦! 仲要殺人! 講真, 佢都唔會夠你打啦... 點解要殺人滅口! 咁無人性!


媽咪話... 以前d人簡單好多, 無電腦, 社會風氣都好好多! 咁係進步同科技令人敗壞?

非一般"頭痛"

星期三開始"頭痛", 不過唔係一般嘅頭痛!
頭痛係裡面痛, 但係我頭痛係出面痛,
由右邊耳仔開始痛到去頭殼出面, 一掂就痛!
都唔知係乜原因!
連瞓覺將個頭放係枕頭都痛!
食必利痛都無用!
係頭皮痛呀!!

生日安排

安排咗迪士尼樂園比佢!
雖已經去過... 不過, 今次應該會有d唔同!
因為入到去有好多人同佢講"生日快樂"!
老公都話好特別, 從來都未試過有陌生人同佢講"生日快樂"!
略略估計都有40-50人...
祝你永遠開心快樂! Happy Birthday!!

高人

話說我地倆個琴日去咗Element睇戲!
睇完戲搭番26號小巴番黃埔;
就係小巴站個站長... 佢同電話裡面嘅人對答90%係粗口, 非常流利!
點知有個日本籍人士上車, 車長懷疑佢無入錢,
就同站長講... 個站長一上到車, 用一口流利日語同佢對話... 勁呀!!
我地全車人都"O"哂咀, 諗都無諗過一個站長竟然可以操一口流利日語!
真係有懷疑... 站長會唔會有幾個master係身!

驚喜的生日會

19/2 係老公嘅生日, 可惜當日佢要返學!
所以哩... 我地班弟兄姊妹為佢開咗個驚喜的生日會!
真係好驚喜架! 佢比我地赫到呆咗. 無哂反應!
雖然只係14個人... 不過非常開心!
仲食淨好多嘢!!! 特別要鳴謝Boy Boy...
因為佢非常配合... 無出過聲... 如果唔係就會穿煲赫唔到Benson啦!

謹在此代Benson多謝各位弟兄姊妹為佢安排咗一個咁驚喜嘅生日會!
(佢果晚完咗之後... 仲驚緊呀! hahah...)

情人節!!

今早返工見到通街都係花... 一個人攞住好幾扎!
聽講今年d花唔平, 一扎普普通通都要五六百, 見得吓人都要800-900, 最貴要成一萬蚊一扎.
都係花一扎... 點解咁貴? 係唔係越貴越代表有誠意? 一萬蚊不如買粒鑽石仔或節現仲好啦!

好在我老公無做傻佬!

情人節送花都係做比人地睇jie... 其實, 我覺得如果平時收花會開心d. 無原因之下送比你wor.. 仲浪漫啦!

仙台之旅

仙台之旅 - 實在太舒服太輕鬆了!

第一天
下午四時到達仙台機場, 氣溫零下1度, 但卻比香港溫暖, 因為當天香港天氣9度, 而且下著雨! 還沒有步出機場, 有一個朝日日報的日本記者走上前向我倆要求做訪問, 問一些關於來仙台的原因! 很特別而且很難忘的一次經驗! 用了五分鐘時間做了人生第一次的訪問! 步出機場... 出發往餐館吃晚餐. 仙台的特色食品 - 牛舌! 懷著很高的期望... 可惜有點失望! 晚餐後回仙台酒店, 一間不大的酒店! 我倆走了很遠的路才找到一間便利店, 終於買到我的至愛-日本鮮奶!



第二天
早上七時morning call, 出發往仙台三大美景之一"松島". 乘坐遊艇出海觀賞, 每一個小島上都長滿密密的松樹, 好像一個個的盆景放在海中一樣. 隨著遊艇前行, 海鷗不斷的跟隨著我們. 因為船上的人用蝦條來餵食牠們! 令一群又一群的海鷗來覓食!



接著下午, 前往期待已久的"藏王山"觀賞樹冰和樹掛. 經過兩個纜車轉乘站, 登上1661米高山, 雖然非常寒冷, 氣溫是零下十八度, 加上大風雪. 卻難阻不了我們熱烘烘的心, 記得在電視裡看到的一棵棵的樹冰, 何其壯觀! 步出纜車站, 腳都站不穩... 真的很冷!! 忍受不了, 走回纜車站躲進餐廳裡, 做好準備功夫, 就是叫了兩客熱飯, 然後再出去挑戰藏王山! 其實在餐廳裡也能看見藏王山的樹冰, 風雪有兩度突然停下, 眼前出現了一場非常壯觀的樹冰. 可惜未能拍攝下來, 唯有將他好好的留在腦裡. 飯後, 勇敢的踏出去, 果然能量大增, 比先前行遠了4米之多! 又要折返, 大自然的威力真的不能輕視! 只好乘纜車下山去... 山腳的氣溫是四度, 溫暖得很!



之後, 返回溫泉酒店. 晚飯前, 還有時間可以享受溫泉, 舒服得很! 晚餐後, 出外逛了一回! 回酒店又再去泡多一次溫泉才去睡覺... 人生一樂也! 回去睡一個好覺!



第三天
雖然領隊安排了八時morning call, 但我倆卻早了兩小時起床, 目的是再去泡多一次溫泉! 廿四小時之內, 泡三次溫泉, 其舒服的感覺...非筆墨能形容! 吃過日式早飯之後出發往山形縣酒田"阿信"的故鄉... 看看古蹟及米倉! 我們還買了一包2公斤的日本米給媽媽做手信!



午飯後, 去了欣賞日本的傳統表演"藝妓". 當然, 不會明白她們唱甚麼, 但因為時間很短(只有三十分鍾), 所以還可以應付!



之後, 返回"花卷溫泉酒店", 領隊說這溫泉酒店在日本非常有名的! 今晚是自助餐, 吃得很飽! 之後又去了泡溫泉... 真是將一年以來的疲累一浸而去! 皮膚也滑溜溜的像牛奶般!

第四天
早上享受完豐富的自助早餐後, 便出發往士多啤梨園, 雖然不是太大粒, 但味道非常清甜; 香港絕對嚐不到!



之後去了小岩井農場, 喝了一支很美味的牛奶, 滑不留口! 午飯後到了一所盛岡手工藝製房及伊達政宗紀念像(青葉城遺蹟), 便返回仙台市中心, 與第一天的酒店一樣, 回酒店房間放下行李! 享用燒肉晚饍, 是晚自費加了一塊"松板西冷牛扒", 價值一萬日元! 物有所值... 入口即溶, 美味無窮! 餐後, 開始最興奮的活動 - 自由購物! 買了很多我喜愛的唐老鴨, 而Benson一句怨言也沒有, 反而令我有點不好意思! 大約九時半已返回酒店, 還享受了高級消夜-雞泡魚剌身; 之後才開始收拾行李, 因為是早機返回香港!



第五天
六時十五分便要起床, 七時正要上旅遊巴士出發去機場, 所以早餐都是酒店用便當型式, 讓我們在車上享用! 九時四十分飛機起飛, 在飛機上, 我們還有機會看到富士山! 也許他想為我們今次的行程畫上一個美麗的句號!



全個旅程, 身體沒有如醫生所說的那麼嚴重! 相反, 我覺得在仙台比香港還要好! 相信空氣質素對我影響很大! 是否需要考慮移民?